Baat karni mujhe mushkil kabhi aisi to na thi

بات کرنی مجھے مشکل کبھی ایسی تو نہ تھی
جیسی اب ہے تری محفل، کبھی ایسی تو نہ تھی

Baat karni mujhe mushkil kabhi aisi to na thi
Jaisi ab hai teri mehfil, kabhi aisi to na thi.

لے گیا چھین کے کون آج ترا صبر و قرار
بے قراری تجھے اے دل، کبھی ایسی تو نہ تھی

Le gaya chheen ke kaun aaj tera sabr-o-qaraar
Be-qarari tujhe ai dil, kabhi aisi to na thi.

اس کی آنکھوں نے خدا جانے کیا کیا جادو
کہ طبیعت مری مائل، کبھی ایسی تو نہ تھی

Us ki aankhon ne Khuda jaane kya kya jadoo
Ke tabiyat meri ma'il, kabhi aisi to na thi.

عکسِ رخسار نے کس کے ہے تجھے چمکایا
تاب تجھ میں مہِ کامل، کبھی ایسی تو نہ تھی

Aks-e-rukhsaar ne kis ke hai tujhe chamkaya
Taab tujh mein mah-e-kaamil, kabhi aisi to na thi.

اب کی جو راہِ محبت میں اٹھائی تکلیف
سخت ہوتی ہمیں منزل، کبھی ایسی تو نہ تھی

Ab ki jo raah-e-mohabbat mein uthai takleef
Sakht hoti humein manzil, kabhi aisi to na thi.

پائے کوباں کوئی زنداں میں نیا ہے مجنوں
آتی آوازِ سلاسل، کبھی ایسی تو نہ تھی

Pa-e-kobaan koi zindaan mein naya hai Majnun
Aati aawaz-e-salaasil, kabhi aisi to na thi.

نگہِ یار کو اب کیوں ہے تغافل اے دل
وہ ترے حال سے غافل، کبھی ایسی تو نہ تھی

Nigah-e-yaar ko ab kyun hai taghaful ai dil
Woh tere haal se ghaafil, kabhi aisi to na thi.

چشمِ قاتل مری دشمن تھی ہمیشہ لیکن
جیسی اب ہو گئی قاتل، کبھی ایسی تو نہ تھی

Chashm-e-qaatil meri dushman thi hamesha lekin
Jaisi ab ho gayi qaatil, kabhi aisi to na thi.

کیا سبب، تو جو بگڑتا ہے ظفرؔ سے ہر بار
خو تری حور شمائل، کبھی ایسی تو نہ تھی

Kya sabab, tu jo bigadta hai Zafar se har baar
Khoo teri hoor-shamaail, kabhi aisi to na thi.