Aaj Shabbir pe kya aalam-e-tanhai hai

آج شبیرؔ پہ کیا عالمِ تنہائی ہے
ظلم کی چاند پہ زہراؔ کی گھٹا چھائی ہے

Aaj Shabbir pe kya aalam-e-tanhai hai
Zulm ki chaand pe Zahra ki ghata chhayi hai

اس طرف لشکرِ اعدا میں صف آرائی ہے
یاں نہ بیٹا، نہ بھتیجا، نہ کوئی بھائی ہے

Is taraf lashkar-e-a'da mein saf-aarai hai
Yaan na beta, na bhateeja, na koi bhai hai

برچھیاں کھاتے چلے جاتے ہیں تلواروں میں
مار لو پیاسے کو، ہے شور ستمگاروں میں

Barchhiyan khaate chale jaate hain talwaron mein
Maar lo pyaase ko, hai shor sitamgaron mein

زخمی بازو ہیں، کمر خم ہے، بدن میں نہیں تاب
ڈگمگاتے ہیں، نکل جاتی ہے قدموں سے رکاب

Zakhmi bazu hain, kamar kham hai, badan mein nahin taab
Dagmagate hain, nikal jaati hai qadmon se rikaab

پیاس کا غلبہ ہے، لب خشک ہیں، آنکھیں ہیں پرآب
تیغ سے دیتے ہیں ہر وار کا اعدا کو جواب

Pyaas ka ghalaba hai, lab khushk hain, aankhen hain pur-aab
Tegh se dete hain har waar ka a'da ko jawab

شدتِ ضعف میں جس جا پہ ٹھہر جاتے ہیں
سیکڑوں تیرِ ستم تن سے گزر جاتے ہیں

Shiddat-e-za'f mein jis ja pe thehar jaate hain
Saikron teer-e-sitam tan se guzar jaate hain

گیسو آلودۂ خوں، لپٹے ہیں رخساروں سے
شانے کٹ کٹ کے لٹک آئے ہیں تلواروں سے

Gesu aalooda-e-khoon lipte hain rukhsaron se
Shaane kat kat ke latak aaye hain talwaron se

تیر پیوست ہیں، خوں بہتا ہے سوفاروں سے
لاکھ آفت میں ہے اک جان دل آزاروں سے

Teer paiwast hain, khoon bahta hai surakhon se
Laakh aafat mein hai ik jaan dil-aazaron se

فکر ہے سجدۂ معبود میں سر دینے کی
وارِ تیغوں سے فرصت نہیں دم لینے کی

Fikr hai sajda-e-Ma'bood mein sar dene ki
Waar-e-teghon se fursat nahin dam lene ki

خون سے تر پیچِ عمامے کے ہیں، سر زخمی ہے
ہے جبیں چاند سی پُرنور مگر زخمی ہے

Khoon se tar pech-e-imame ke hain, sar zakhmi hai
Hai jabeen chaand si pur-noor magar zakhmi hai

سینہ سب برچھیوں سے تا بہ کمر زخمی ہے
تیرِ بیداد سے دل زخمی، جگر زخمی ہے

Seena sab barchhiyon se taa ba kamar zakhmi hai
Teer-e-bedaad se dil zakhmi, jigar zakhmi hai

ضربِ شمشیر سے بیکار ہیں بازو دونوں
ظلم کے تیروں سے مجروح ہیں پہلو دونوں

Zarb-e-shamsheer se bekaar hain baazu dono
Zulm ke teeron se majrooh hain pehlu dono

برچھی آ کر کوئی پہلو میں لگا جاتا ہے
مارتا ہے کوئی نیزہ تو غش آ جاتا ہے

Barchhi aa kar koi pehlu mein laga jaata hai
Maarta hai koi neza to ghash aa jaata hai

بڑھتے ہیں زخمِ بدن، زور گھٹا جاتا ہے
بند آنکھیں ہیں، سرِ پاک جھکا جاتا ہے

Barhte hain zakhm-e-badan, zor ghata jaata hai
Band aankhen hain, sar-e-paak jhuka jaata hai

گردِ زہراؔ و علیؔ گریہ کناں پھرتے ہیں
غل ہے، گھوڑے سے امامِ دو جہاں گرتے ہیں

Gard-e-Zahra-o-Ali girya-kunaan phirte hain
Ghul hai ghore se Imam-e-do Jahaan girte hain

گرتے ہیں قطرۂ خوں زخمِ جبیں سے پیہم
دستِ مجروح سے کھنچ سکتے نہیں تیرِ ستم

Girte hain qatra-e-khoon zakhm-e-jabeen se paiham,
Dast-e-majrooh se khinch sakte nahin teer-e-sitam.

فکر ہے بخششِ امت کی، کچھ اپنا نہیں غم
کرتے ہیں شکرِ خدا خشک زباں سے ہر دم

Fikr hai bakhshish-e-ummat ki, kuch apna nahin gham,
Karte hain shukr-e-Khuda khushk zabaan se har dam.

ہے عبا تیروں سے غربال، قبا گلگوں ہے
ہونٹ بھی وقت سے زخمی ہیں، دہن پر خوں ہے

Hai aba teeron se gurbaan, qaba gulgoon hai,
Hont bhi waqt se zakhmi hain, dahan par khoon hai.

زین سے ہوتا ہے جدا دوشِ محمدؐ کا مکیں
چمنِ فاطمہؑ کا سرو ہے مائل بہ زمیں

Zeen se hota hai juda dosh-e-Muhammad ka makeen,
Chaman-e-Fatima ka sarv hai mail ba-zameen.

برچھیاں گرد ہیں اور بیچ میں ہیں سرورِ دیں
ہے یہ نزدیک گرے مہرِ نبوت کا نگیں

Barchhiyan gird hain aur beech mein hain Sarwar-e-Deen,
Hai yeh nazdeek gire mehr-e-nubuwwat ka nageen.

پاؤں ہر بار رکابوں سے نکل جاتے ہیں
"یا علیؑ" کہتی ہے زینبؑ تو سنبھل جاتے ہیں

Paaon har baar rikaabon se nikal jaate hain,
"Ya Ali!" kehti hai Zainab to sambhal jaate hain.

لاکھ تلواریں ہیں اور ایک تنِ اطہر ہے
ایک مظلوم ہے اور ظالموں کا لشکر ہے

Laakh talwaarein hain aur ek tan-e-athar hai,
Ek mazloom hai aur zalimon ka lashkar hai.

سیکڑوں خنجرِ فولاد ہیں اور اک سر ہے
نہ کوئی یار، نہ ہمدم، نہ کوئی یاور ہے

Saikron khanjar-e-faulad hain aur ek sar hai,
Na koi yaar, na humdam, na koi yaawar hai.

باگ گھوڑے کی لٹکتی ہے، اٹھا سکتے نہیں
سامنے اہلِ حرم روتے ہیں، جا سکتے نہیں

Baag ghoray ki latakti hai, utha sakte nahin,
Saamne Ahl-e-Haram rote hain, ja sakte nahin.

کوئی سیدؑ کا نہیں، آہ! بچانے والا
حربے لاکھوں ہیں، اور اک زخم اٹھانے والا

Koi Syed ka nahin aah, bachane wala,
Harbe laakhon hain, aur ek zakhm uthane wala.

پیاس میں کوئی نہیں پانی پلانے والا
سنبھلے کس طرح بھلا برچھیاں کھانے والا

Pyaas mein koi nahin, paani pilane wala,
Sambhle kis tarah bhala, barchhiyan khane wala.

چرخ سے آگ برستی ہے، زمیں جلتی ہے
مارے گرمی کے زباں خشک ہے، لُو چلتی ہے

Charkh se aag barasti hai, zameen jalti hai,
Maare garmi ke zabaan khushk hai, loo chalti hai.

کہیں دم لینے کو سایہ نہیں، ہے وقتِ زوال
اینٹھی جاتی ہے زباں، پیاس کی شدت ہے کمال

Kahin dam lene ko saaya nahin, hai waqt-e-zawaal,
Ainthi jaati hai zabaan, pyaas ki shiddat hai kamaal.

کبھی زینبؑ کا ہے غم، گاہ سکینہؑ کا خیال
دن جو ڈھلتا ہے تو حضرت ہوئے جاتے ہیں نڈھال

Kabhi Zainab ka hai gham, gaah Sakina ka khayaal,
Din jo dhalta hai to Hazrat hue jaate hain nidhaal.

مثلِ خورشید بدن ضعف سے تھراتا ہے
نیرِ برجِ امامت پہ زوال آتا ہے

Misl-e-khursheed, badan zo'f se thar-tharaata hai,
Nayyir-e-burj-e-imamat pe zawaal aata hai.

کہتے ہیں ظالموں سے خشک زباں دکھلا کر
بہرِ حق پانی کا اک جام پلا دو لا کر

Kehte hain zalimon se, khushk zabaan dikhla kar,
Bahr-e-Haq paani ka ek jaam pila do la kar.

اہلِ کیں کہتے ہیں یہ تیغِ ستم چمکا کر
آبِ شمشیر پیو، برچھیوں کے پھل کھا کر

Ahl-e-keen kehte hain yeh tegh-e-sitam chamka kar,
Aab-e-shamsheer piyo, barchhiyon ke phal kha kar.

یہ سخن سن کے بھی غصہ نہیں فرماتے ہیں
یاس سے سوئے فلک دیکھ کے رہ جاتے ہیں

Yeh sukhan sun ke bhi ghussa nahin farmate hain,
Yaas se soo-e-falak dekh ke reh jaate hain.

عرض کرتے ہیں یہ خالق سے کہ اے ربِّ غفور!
تو ہے عالم کہ نہیں کچھ ترے بندے کا قصور

Arz karte hain yeh Khaliq se ke aye Rabb-e-Ghafoor!
Tu hai Aalim ke nahin kuch tere bande ka qusoor.

کرتے ہیں یہ مجھے بے جرم و خطا تیغوں سے چور
ہاتھ امت پہ اٹھانا نہیں مجھ کو منظور

Karte hain yeh mujhe be-jurm-o-khata teghon se choor,
Haath ummat pe uthana nahin mujh ko manzoor.

جانتے ہیں کہ محمدؐ کا نواسہ ہوں میں
پانی دیتے نہیں، دو روز کا پیاسا ہوں میں

Jaante hain ke Muhammad ka nawasa hoon main,
Paani dete nahin, do roz ka pyaasa hoon main.

تو نے بچپن سے مرے ناز اٹھائے، یا رب!
وہ عنایت کی جو تجھ سے کیا میں نے طلب

Tu ne bachpan se mere naaz uthaye Ya Rab,
Woh inayat ki jo tujh se kiya main ne talab.

تیرا محبوب بنا، عید کو میرا مرکب
روزہ رکھا تو چھپا، مہر نمایاں ہوئی شب

Tera mehboob bana Eid ko mera markab,
Roza rakha to chhupa, mehr numayan hui shab.

بھوک میں خلد کا کھانا مجھے امداد کیا
بھیج کر ہرنی کا بچہ مرا دل شاد کیا

Bhook mein khuld ka khana mujhe imdaad kiya,
Bhej kar harni ka bachcha mera dil shaad kiya.

اب اگر ہے یہ تری مصلحت، اے ربِّ قدیر!
ہو رواں حلق پہ اس پیاسے کے آبِ شمشیر

Ab agar hai yeh teri maslahat aye Rabb-e-Qadeer,
Ho rawan halq pe is pyaase ke aab-e-shamsheer.

میرے مولا! بہ سر و چشم ہے حاضر شبیرؑ
حکمِ حاکم میں یہ طاقت ہے، کروں میں تاخیر؟

Mere Maula ba sar-o-chashm hai haazir Shabbir,
Hukm-e-Hakim mein yeh taqat hai karoon main ta'kheer.

جلد گردن پہ رواں خنجرِ برّاں ہووے
اے خوشا وہ جو تری راہ میں قرباں ہووے

Jald gardan pe rawan khanjar-e-burraan hove,
Aye khusha woh jo teri raah mein qurbaan hove

غم نہیں کچھ مجھے، گو بے کس و بے یار ہوں میں
زیرِ شمشیر گلا رکھنے کو تیار ہوں میں

Gham nahin kuchh mujhe go be-kas-o-be-yaar hoon main,
Zair-e-shamsheer gala rakhne ko tayyar hoon main.

تو مددگار ہے، مختار ہے، لاچار ہوں میں
وقتِ مشکل ہے، عنایت کا طلبگار ہوں میں

Tu madadgaar hai, Mukhtaar hai, laachaar hoon main,
Waqt-e-mushkil hai, inayat ka talabgaar hoon main.

تیرے سجدے میں یہ سر تن سے جدا ہو جاوے
عہدِ طفلی کا جو وعدہ ہے، وفا ہو جاوے

Tere sajde mein yeh sar tan se juda ho jaave,
Ahd-e-tifli ka jo waada hai, wafa ho jaave.

سختیاں مرگ کی کر اپنے کرم سے آساں
لب پہ تکبیر ہو، جب خلق پہ خنجر ہو رواں

Sakhtiyan marg ki kar apne karam se aasaan,
Lab pe takbeer ho, jab halq pe khanjar ho rawaan.

دل میں ہو یاد تری، بند ہو جس وقت زباں
دم بھروں تیرا ہی، تن سے جو نکلنے لگے جاں

Dil mein ho yaad teri, band ho jis waqt zabaan,
Dam bharoon tera hi, tan se jo nikalne lage jaan.

بعدِ چہلم جو مجھے قبر میسر ہووے
زخمی تن پر نہ فشار، اے مرے داور! ہووے

Baad-e-chehlum jo mujhe qabr mayassar hove,
Zakhmi tan par na fishaar, aye mere Daawar hove.

رحم کر، رحم کر، شرمندہ ہوں اے یارِ خدا
بندگی کا ترے جو حق تھا ادا ہو نہ سکا

Rahm kar rahm kar sharminda hoon ae Yaar-e-Khuda
Bandagi ka tere jo haqq tha ada ho na saka

خوفِ محشر سے بدن کانپتا ہے سرتاپا
ہوگی اعمال کی پرسش تو کہوں گا میں کیا؟

Khauf-e-Mahshar se badan kaanpta hai, sar-ta-pa
Hogi aamaal ki pursish to kahoon ga main kya?

کوئی تحفہ ترے لائق نہیں پاتا ہے حسینؑ
ہاتھ خالی ترے دربار میں آتا ہے حسینؑ

Koi tohfa tere laaiq nahin paata hai Husain
Haath khaali tere darbaar mein aata hai Husain

تقویت دل کو کرم سے ہے ترے، یا رحمٰن!
نہیں مایوس کہ رحمت ہے تری بے پایاں

Taqwiyat dil ko karam se hai tere ya Rahman
Nahin mayoos ke rehmat hai teri be-payaan

مشکلیں بندوں کی کر دیتا ہے دم میں آساں
شکرِ الطاف و عنایات میں قاصر ہے زباں

Mushkilein bandon ki kar deta hai dam mein aasaan
Shukr-e-altaaf-o-inayaat mein qaasir hai zabaan

عاصیوں سے بھی محبت نہیں کم کرتا ہے
جرم وہ کرتے ہیں تو لطف و کرم کرتا ہے

Aasiyon se bhi muhabbat nahin kam karta hai
Jurm woh karte hain to lutf-o-karam karta hai

میں تری راہ میں مظلومی سے ہوتا ہوں فدا
تو ہے آگاہ کہ دو دن کا ہوں بھوکا پیاسا

Main teri raah mein mazloomi se hota hoon fida
Tu hai aagah ke do din ka hoon bhooka pyaasa

چاہتا ہوں میں یہی اپنی شہادت کا صلہ
مغفرت امتِ عاصی کی ہو، اے بارِ خدا!

Chahta hoon main yahi, apni shahadat ka sila
Maghfirat ummat-e-aasi ki ho ae Baar-e-Khuda

ہے گوارا مجھے جو کچھ کہ اذیت ہووے
ان کو دنیا میں بھی، عقبیٰ میں بھی راحت ہووے

Hai gawara mujhe jo kuchh ke aziyyat hove
Un ko duniya mein bhi uqba mein bhi rahat hove

عرض کرتے تھے یہ خالق سے شہِ بندہ نواز
یک بیک عالمِ بالا سے یہ آئی آواز

Arz karte the yeh Khaliq se Shah-e-Banda Nawaz
Yak-bayak Aalam-e-Bala se yeh aayi awaaz

اے مرے شیر کے فرزند، نبیؐ کے دمساز!
تجھ سے ہم خوش ہیں، پذیرا ہے ترا عجز و نیاز

Ae mere Sher ke Farzand, Nabi ke Damsaaz
Tujh se hum khush hain, pazeera hai tera ajr-o-niyaz

مرد ہے، عاشقِ کامل ہے، وفادار ہے تو
جو کہا وہ ہی کیا، صادقُ الاقرار ہے تو

Mard hai, Aashiq-e-Kamil hai, wafadaar hai tu
Jo kaha woh hi kiya, Sadiq-ul-Iqraar hai tu

تو بھی مقبول ہے اور تیری عبادت بھی قبول
یہ اطاعت بھی ہے مقبول، یہ طاعت بھی قبول

Tu bhi maqbool hai aur teri ibadat bhi qubool
Yeh ita'at bhi hai maqbool, yeh ta'at bhi qubool

عاجزی بھی تری مقبول، شہادت بھی قبول
تیری خاطر سے ہمیں بخششِ امت بھی قبول

Aajizi bhi teri maqbool, shahadat bhi qubool
Teri khatir se hamein bakhshish-e-ummat bhi qubool

ہم نے خیلِ شہدا کا تجھے سردار کیا
امتِ احمدِ مختارؐ کا مختار کیا

Hum ne khail-e-shuhada ka tujhe sardar kiya
Ummat-e-Ahmad-e-Mukhtar ka mukhtar kiya

دوست داروں کا ترے گلشنِ جنت ہے مقام
تا ابد سایۂ طوبیٰ میں کریں گے آرام

Dostdaron ka tere Gulshan-e-Jannat hai maqam
Ta-abad saaya-e-Tooba mein karenge aaram

ہوں گے محشور ترے ساتھ عزادار تمام
تجھ کو جو روئیں گے، آنچ ان پہ ہے دوزخ کی حرام

Honge mahshoor tere saath azaadar tamaam
Tujh ko jo roenge, aanch un par hai Dozakh ki haraam

غم نہ کھا! اہلِ جہاں تیرے محب سارے ہیں
تو ہے پیارا، ترے پیارے بھی ہمیں پیارے ہیں

Gham na kha! Ahl-e-Jahan tere muhib saare hain
Tu hai pyara, tere pyaron mein bhi hamein pyare hain

ہوں گے ہر رنج سے محفوظ ترے تعزیہ دار
سختیِ مرگ نہ ان کو ہے، نہ ایذائے فشار

Honge har ranj se mehfooz tere taziyadar
Sakhti-e-marg na un ko hai, na eza-e-fishar

دمِ مردن نظر آوے گا علیؑ کا دیدار
قبر سے گلشنِ فردوس کی دیکھیں گے بہار

Dam-e-mardan nazar aavega Ali ka deedar
Qabr se Gulshan-e-Firdous ki dekhenge bahaar

دارِ دنیا ہی میں ہیں جو، سو انہیں ایذا ہے
آنکھیں جب بند ہوئیں، پھر درِ جنت وا ہے

Daar-e-duniya hi mein hain jo so unhein eza hai
Aankhen jab band huin phir, Dar-e-Jannat wa hai

تجھ سا عابد نہ ہوا ہے، نہ کوئی ہووے گا
تیر کھا کھا کے کسی نے بھی ہے یوں شکر کیا

Tujh sa aabid na hua hai, na koi hove ga
Teer kha kha ke kisi ne bhi hai yun shukr kiya

طاعتِ خلق سے اک سجدہ ہے افضل تیرا
عرشِ اعظم پہ ملائک تری کرتے ہیں ثنا

Ta'at-e-Khaliq se ek sajda hai afzal tera
Arsh-e-Azam par malaaik teri karte hain sana

سارا گھر میری محبت میں فنا تو نے کیا
بندگی کا تھا جو کچھ حق، وہ ادا تو نے کیا

Saara ghar meri muhabbat mein fana tu ne kiya
Bandagi ka tha jo kuchh haqq woh ada tu ne kiya

حشر تک روئے گا مظلومی پہ تیری عالم
تیرا ماتم نہیں ہووے گا جہاں میں کبھی کم

روضۂ پاک کو تیرے یہ شرف بخشیں گے ہم
آئیں گے جس کی زیارت کو ملک ہو کے بہم

یہ زمیں عرش سے رتبے میں سوا ہووے گی
خاکِ تربت کی تری خاکِ شفا ہووے گی

Hashr tak roye ga mazloomi pe teri aalam
Tera maatam nahin hove ga jahaan mein kabhi kam.

Roza-e-Pak ko tere ye sharaf bakhshen ge hum
Aayenge jis ki ziyaarat ko malak ho ke baham.

Ye zameen Arsh se rutbe mein siwa hove gi
Khaak-e-turbat ki teri khaak-e-shifa hove gi.

یہ صدا سن کے ہوئے شاد شہِ ہر دو سرا
آ گئی از سرِ نو جسم میں طاقت گویا

جھک کے سجدے کی طرف عجز سے رو کر یہ کہا
میرے مولا! میں تری بندہ نوازی کے فدا

کیوں نہ ممتاز ہو وہ، تو جسے رتبہ بخشے
اس کفِ خاک کو کیا رتبۂ اعلیٰ بخشے

Ye sada sun ke hue shaad Shah-e-Har Do Sara
Aa gayi az sar-e-nau jism mein taaqat goya.

Jhuk ke sajde ki taraf ajz se ro kar ye kaha
Mere Maula! main teri banda nawazi ke fida.

Kyun na mumtaaz ho woh, tu jise rutba bakhshe
Is kaf-e-khaak ko kya rutba-e-aala bakhshe.

ابھی مولا نے سرِ عجز اٹھایا نہ تھا، آہ!
نیزہ اک چھاتی پہ مارا جو کسی نے ناگاہ

غش میں گرنے لگے گھوڑے سے امامِ ذی جاہ
آئی خاتونِ قیامت کی صدا: "بسم اللہ!"

تھامنے آئے علیؑ خلد سے گھبرائے ہوئے
دوڑے محبوبِ خدا ﷺ ہاتھوں کو پھیلائے ہوئے

Abhi Maula ne sar-e-ajz uthaya na tha, aah!
Neza ik chhati pe maara jo kisi ne nagaah.

Ghash mein girne lage ghore se Imam-e-Zi Jah
Aayi Khatun-e-Qiyamat ki sada: "Bismillah!"

Thaamne aaye Ali khuld se ghabraye hue
Daure Mehboob-e-Khuda ﷺ haathon ko phailaye hue.

اک جفا کیش نے پھر پہلو پہ نیزہ مارا
چھد گیا توڑ کے چھاتی کو کلیجہ سارا

پشتِ تازی پہ سنبھلنے کا نہ پایا یارا
گر پڑا خاک پہ وہ عرشِ خدا کا تارا

گرد آلود قبائے شہِ پرنور ہوئی
ریت زخموں کے لیے مرہمِ کافور ہوئی

Ik jafa-kesh ne phir pehlu pe neza maara
Chhid gaya tor ke chhati ko kaleja saara.

Pusht-e-Taazi pe sambhalne ka na paaya yaara
Gir para khaak pe woh Arsh-e-Khuda ka taara.

Gard-aalood qaba-e-Shah-e-Purnoor hui
Rait zakhmon ke liye marham-e-kafoor hui.

خاک و خوں میں جو تڑپتے تھے شہنشاہِ زمن
گل کے مانند کھلے جاتے تھے سب زخمِ بدن

طلبِ آب میں کھولے ہوئے تھے خشک دہن
گرد کھینچے ہوئے تلواریں کھڑے تھے دشمن

غمِ ناموس بھی تھا، پیاس کی بھی شدت تھی
پھر سکینہؑ کو نہ دیکھ آئے، یہی حسرت تھی

Khaak-o-khoon mein jo tarapte the Shahanshah-e-Zaman
Gul ke maanind khule jaate the sab zakhm-e-badan.

Talab-e-aab mein khole hue the khushk dahan
Gard kheenche hue talwarein khare the dushman.

Gham-e-namoos bhi tha, pyaas ki bhi shiddat thi
Phir Sakina ko na dekh aaye, yahi hasrat thi.

کان میں آتی تھی زینبؑ کے صدائے جاں کَاہ
دل تڑپ جاتا تھا، کرتے تھے عجب درد سے آہ

راہ روکے ہوئے خیمے کی کھڑے تھے گمراہ
نیم وا چشم سے کرتے تھے سوئے خیمہ نگاہ

تنِ زخمی پہ جو پیکانِ ستم گڑتے تھے
خاک سے اٹھتے تھے اور کانپ کے گر پڑتے تھے

Kaan mein aati thi Zainab ke sada-e-jaan-kaah
Dil tarap jaata tha, karte the ajab dard se aah.

Raah roke hue khaime ki khare the gumraah
Neem-wa chashm se karte the soo-e-khaima nigaah.

Tan-e-zakhmi pe jo paikan-e-sitam garte the
Khaak se uthte the aur kaanp ke gir parte the.

کہتا تھا فوج میں سب سے عمرِ بد اختر
کھینچے کیوں تیغوں کو ہاتھوں میں کھڑے ہو ششدر؟

ریگِ تفتیدہ پہ ہے غش میں علیؑ کا دلبر
جاؤ، کیا دیر ہے، کاٹو شہِ مظلوم کا سر

تیغ سے فاطمہؑ زہرا کا گلا چاک کرو
جلد ہاں خاتمۂ پنجتنِ پاک کرو

Kehta tha fauj mein sab se Umar-e-Bad Akhtar
Kheenche kyun teghon ko haathon mein khare ho shashdar?

Raig-e-tafteeda pe hai ghash mein Ali ka dilbar
Jao, kya dair hai, kaato Shah-e-Mazloom ka sar.

Tegh se Fatima Zahra ka gala chaak karo
Jald haan Khatima-e-Panjtan-e-Pak karo.

ایسے مظلوم کا سر کاٹنا کیا ہے دشوار
جس کا کوئی بھی مددگار، نہ ہمدرد، نہ یار

عورتیں ہیں کئی خیمے میں غریب و ناچار
مر چکے پہلے ہی جو خون کے تھے دعویدار

خوں بہا بھی نہ کوئی مانگنے کو آوے گا
اک پسر ہے، سو وہ بیمار ہے، مر جاوے گا

Aise mazloom ka sar kaatna kya hai dushwaar
Jis ka koi bhi madadgaar, na hamdard, na yaar.

Auratein hain kai khaime mein ghareeb-o-naachaar
Mar chuke pehle hi jo khoon ke the daawedaar.

Khoon baha bhi na koi maangne ko aave ga
Ik pisar hai, so woh beemaar hai, mar jaave ga.

کانپ کر کہتے تھے سب، ہم سے نہ ہوگا یہ ستم
ذبحِ فرزندِ محمدؐ کو نہیں کرنے کے ہم

ایسے مظلوم کی چھاتی پہ جو رکھے گا قدم
پاؤں جل جائے گا، تھرائے گا عرشِ اعظم

پیٹتے قبر سے محبوبِ خدا ﷺ آویں گے
بخدا فاطمہؑ کی آہ سے جل جاویں گے

Kaanp kar kehte the sab, hum se na hoga ye sitam
Zabh-e-Farzand-e-Muhammad ﷺ ko nahin karne ke hum.

Aise mazloom ki chhati pe jo rakhe ga qadam
Paaon jal jaaye ga, tharaye ga Arsh-e-Azam.

Peette qabr se Mehboob-e-Khuda ﷺ aaven ge
Ba-Khuda Fatima ki aah se jal jaaven ge.

کون بے کس کو بھلا ذبح کرے بے تقصیر؟
پھرتا ہے کوئی پیاسے کے گلے پر شمشیر؟

گو کہ بے کس ہے، پہ آساں نہیں قتلِ شبیرؑ
حشر میں ہوئیں گے محبوبِ خدا ﷺ دامن گیر

تو سمجھتا ہے کہ اس کا کوئی خوں خواہ نہیں؟
بنتِ احمدؐ نہیں، حیدرؑ نہیں، اللہ نہیں؟

Kaun be-kas ko bhala zabh kare be-taqseer?
Phirta hai koi pyaase ke gale par shamshir?

Go ke be-kas hai, pe aasaan nahin qatl-e-Shabbir
Hashr mein honge Mehboob-e-Khuda ﷺ daaman-geer.

Tu samajhta hai ke us ka koi khoon-khwaah nahin?
Bint-e-Ahmad nahin, Haider nahin, Allah nahin?

تھا جو دمساز عمر ابنِ نمیرِ اظلم
بڑھ کے تیغ اس نے سرِ شاہ پہ ماری اس دم

تا جبیں ہو گیا مجروح سرِ شاہِ امم
تھام کر سر کو پکارے یہ امامِ عالم

نہ میسر تجھے اس ہاتھ سے کھانا ہووے
تو تہی دست جہنم کو روانہ ہووے

Tha jo damsaaz Umar ibn Numair-e-Azlam
Barh ke tegh us ne sar-e-Shah pe maari us dam.

Ta jabin ho gaya majrooh sar-e-Shah-e-Umam
Thaam kar sar ko pukare ye Imam-e-Aalam.

Na mayassar tujhe is haath se khaana hove
Tu tehi-dast Jahannum ko rawana hove.

چاہا ظالم نے کہ پھر شہؑ پہ کرے تیغ کا وار
دیکھا انگشت بدنداں ہیں رسولِ مختار ﷺ

خشک اس وقت ہوئے دستِ ستمگر اک بار
ہاتھ سے تیغ گری، خوف سے بھاگا خوں خوار

یاں سرِ پاک سے حضرت کے لہو جاری تھا
خم سوئے قبلہ تھے، بند آنکھیں تھیں، غش طاری تھا

Chaaha zaalim ne ke phir Shah pe kare tegh ka waar
Dekha angusht-ba-dandaan hain Rasool-e-Mukhtar ﷺ.

Khushk us waqt hue dast-e-sitamgar ik baar
Haath se tegh giri, khauf se bhaaga khoon-khwaar.

Yaan sar-e-Pak se Hazrat ke lahu jaari tha
Kham soo-e-Qibla the, band aankhen thin, ghash taari tha.

جب تڑپنے کی بھی طاقت نہ رہی سرور کو
غل ہوا یہ کہ غش آیا، خلفِ حیدرؑ کو

فوج سے شمر بڑھا کھینچے ہوئے خنجر کو
سب سے کہتا تھا کہ اب کاٹو سرِ سرور کو

خلفِ احمدِ مختار کا قاتل ہوں میں
کام میرا ہے، اسی کام کے قابل ہوں میں

Jab tarapne ki bhi taqat na rahi Sarwar ko
Ghul hua yeh ke ghash aaya, Khalaf-e-Haider ko.

Fauj se Shimr barha kheenche hue khanjar ko,
Sab se kehta tha ke ab kaato Sar-e-Sarwar ko.

Khalaf-e-Ahmad-e-Mukhtar ka qatil hoon main,
Kaam mera hai, isi kaam ke qabil hoon main.

مجھ کو حیدرؑ سے غرض ہے نہ محمدؐ سے ہے کام
رو دیں محبوبِ خدا، ہووے خوشی حاکمِ شام

دولتِ فاطمہؑ لے جاؤں میں، پاؤں انعام
روحِ حیدرؑ کی ہو بے چین، مجھے ہو آرام

منہ نہ میں دولتِ دنیا سے کبھی پھیروں گا
آج زہراؑ کے کلیجے پہ چھری پھیروں گا

Mujh ko Haider se gharaz hai na Muhammad se hai kaam,
Ro dein Mehboob-e-Khuda, howe khushi Hakim-e-Shaam.

Daulat-e-Fatima le jaaun main, paaun inaam,
Rooh-e-Haider ki ho bechain, mujhe ho aaraam.

Munh na main daulat-e-duniya se kabhi pheroonga,
Aaj Zahra ke kaleje par chhuri pheroonga.

تیز کرتا ہوا خنجر کو گیا شہ کے قریں
آسماں ہل گیا، تھرا گئی مقتل کی زمیں

رو رو چلانے لگی زینبِؑ ناشادِ حزیں
غش میں بھی گھیرے ہیں، ہے ہے مرے بھائی کو لعیں

رحم زہراؑ کے پسر پر نہیں کھاتا کوئی
خاک سے بھی نہیں زخمی کو اٹھاتا کوئی

Tez karta hua khanjar ko gaya Shah ke qareen,
Aasmaan hil gaya, tharra gayi maqtal ki zameen.

Ro ro chillane lagi Zainab-e-Nashaad-e-Hazeen,
Ghash mein bhi ghere hain, hai hai mere bhai ko laeen.

Rahm Zahra ke pisar par nahin khata koi,
Khaak se bhi nahin zakhmi ko uthata koi.

کس سے فریاد کروں، جا کے میں دکھیا، ہے ہے
نہ محمدؐ ہیں، نہ حیدرؑ ہیں، نہ زہراؑ، ہے ہے

لاکھ دشمن ہیں، مرا بھائی ہے تنہا، ہے ہے
تیغوں سے کٹتا ہے، زہراؑ کا کلیجا، ہے ہے

سروِ گلزارِ رسالت کو قلم کرتے ہیں
ہائے سیدؑ پہ، مسافر پہ ستم کرتے ہیں

Kis se faryaad karoon, ja ke main dukhiya, hai hai
Na Muhammad hain, na Haider hain, na Zahra, hai hai

Laakh dushman hain, mera bhai hai tanha, hai hai
Teghon se katta hai Zahra ka kaleja, hai hai

Sarv-e-Gulzaar-e-Risaalat ko qalam karte hain
Haaye Syed par, musaafir par sitam karte hain

گردِ زینبؑ کے تھا ناموسِ پیمبر کا ہجوم
بانو روتی تھی، کھڑی پیٹتی تھی سر، کلثوم

کہتی تھی دیکھ کے میداں کو سکینہؑ معصوم
اے پھوپھی! نرغۂ اعدا میں ہیں شاہِ مظلوم

جاؤں گی اب میں، ٹھہرنے کی نہیں آپ کے پاس
شمرؔ خنجر لیے جاتا ہے مرے باپ کے پاس

Gard-e-Zainab ke tha Naamoos-e-Paighambar ka hujoom
Bano roti thi, khari peetti thi sar, Kulsoom

Kehti thi dekh ke maidaan ko Sakina Masoom
Ae Phupphi! Nargha-e-a'da mein hain Shah-e-Mazloom

Jaaungi ab main, theharne ki nahin aap ke paas
Shimr khanjar liye jaata hai mere baap ke paas

باپ کے پاس سے جا کر اسے سرکاؤں گی
جوڑ کر ہاتھوں کو منت سے میں سمجھاؤں گی

اپنے بابا کی میں چھاتی سے لپٹ جاؤں گی
خیمے تک ان کو سنبھالے ہوئے لے آؤں گی

بھوکے پیاسے مرے بابا کو نہ مارے کوئی
ان کے بدلے مرا سر تن سے اتارے کوئی

Baap ke paas se ja kar use sarkaungi
Jor kar haathon ko minnat se main samjhaungi

Apne Baba ki main chhaati se lipat jaaungi
Khaime tak un ko sambhaale hue le aaungi

Bhooke pyaase mere Baba ko na maare koi
Un ke badle mera sar tan se utaare koi

کتنا روکا اسے بانو نے، پہ ہرگز نہ رکی
چھوٹے سے ہاتھوں سے سر پیٹتی میداں کو چلی

پیچھے سر کھولے ہوئے خیمے سے زینبؑ نکلی
پہونچی رن میں تو سکینہؑ یہ عمر سے بولی

او لعیں! حیدرِؑ کرار کی پوتی ہوں میں
رحم کر! مجھ پہ کہ بن باپ کی ہوتی ہوں میں

Kitna roka use Bano ne, pe hargiz na ruki
Chhote se haathon se sar peetti maidaan ko chali

Peechhe sar khole hue khaime se Zainab nikli
Pohnchi ran mein to Sakina yeh Umar se boli

O laeen! Haider-e-Karrar ki poti hoon main
Rahm kar! Mujh pe ke bin baap ki hoti hoon main

دیکھ غربت کو مری، کر مرے بچپن پہ نظر
باپ مارا گیا میرا تو جیوں گی کیوں کر؟

سر پہ آوے گی یتیمی تو میں جاؤں گی کدھر؟
میں تو ہوں باپ کی شیدا، مرا عاشق ہے پدر

باپ بن ایک دم آرام نہ آوے گا مجھے
کون پھر رات کو چھاتی پہ سلاوے گا مجھے

Dekh ghurbat ko meri, kar mere bachpan pe nazar
Baap maara gaya mera to jiyungi kyun kar?

Sar pe aawe gi yateemi to main jaaungi kidhar?
Main to hoon baap ki shaida, mera aashiq hai pidar

Baap bin ek dam aaraam na aawe ga mujhe
Kaun phir raat ko chhaati pe sulaawe ga mujhe

ہنسلیاں اپنی گلے سے تجھے دیتی ہوں اتار
لے مرے کان کا دُر، پر مرے بابا کو نہ مار

ہاتھوں کو جوڑتی ہوں میں ترے آگے ناچار
منع کر دے کوئی، بیکس کو نہ مارے تلوار

گھر میں جو کچھ زر و زیور ہے، وہ لادوں گی میں
جان بابا کی بچے گی تو دعا دوں گی میں

Hansliyan apni gale se tujhe deti hoon utaar
Le mere kaan ka durr, par mere Baba ko na maar

Haathon ko jorti hoon main tere aage naachaar
Mana kar de koi, be-kas ko na maare talwar

Ghar mein jo kuch zar-o-zevar hai, woh laad doongi main
Jaan Baba ki bache gi to dua doongi main

بھیڑ میں مجھ کو نظر آتے نہیں بابا جاں
اتنا کہہ دے کہ سرک جائیں یہ سب بے ایماں

گرد پھر پھر کے میں ہوں اپنے پدر کے قرباں
جا کے دیکھوں گی بدن پر ہیں لگے زخم کہاں

دمِ آخر تو بھلا کام میں آؤں ان کے
اپنے کرتے سے لہو منہ کا چھڑاؤں ان کے

Bheer mein mujh ko nazar aate nahin Baba jaan
Itna keh de ke sarak jaayen yeh sab be-imaan

Gard phir phir ke main hoon apne pidar ke qurbaan
Ja ke dekhungi badan par hain lage zakhm kahaan

Dam-e-aakhir to bhala kaam mein aaun un ke
Apne kurte se lahoo munh ka chhuraun un ke

کتنا کہتی رہی وہ بنتِ شہِ عرشِ جناب
اس ستمگر نے دیا کچھ نہ سکینہؑ کو جواب

پیٹ کر سر کہا زینبؑ نے کہ او خانہ خراب!
تجھ کو آتا نہیں کچھ روحِ پیمبر سے حجاب

ظلم مت کر، اسد اللہ کی جائی ہوں میں
ننگے سر پردے سے باہر نکل آئی ہوں میں

Kitna kehti rahi woh Bint-e-Shah-e-Arsh-e-Janab
Is sitamgar ne diya kuch na Sakina ko jawab

Peet kar sar kaha Zainab ne ke o khana kharab!
Tujh ko aata nahin kuch Rooh-e-Paighambar se hijaab

Zulm mat kar, Asadullah ki jaai hoon main
Nange sar parde se bahar nikal aayi hoon main

میری اماں کا ہے مشہور جہاں میں پردہ
بعدِ رحلت بھی جنازہ نہ کسی نے دیکھا

اس کی بیٹی ہوں، ترے ظلم سے یہ وقت پڑا
سر برہنہ ہوں، گریباں بھی ہے کرتے کا پھٹا

منہ کو اللہ و پیمبر سے چھپاتا ہے تو
میں تو فریادی ہوں، اور آنکھ چراتا ہے تو

Meri Amman ka hai mashhoor jahaan mein parda
Baad-e-Rihlat bhi janaza na kisi ne dekha

Us ki beti hoon, tere zulm se yeh waqt para
Sar barahna hoon, garebaan bhi hai kurte ka phata

Munh ko Allah-o-Paighambar se chhupata hai tu
Main to faryaadi hoon, aur aankh churata hai tu

مارا جاتا ہے ترے سامنے زہراؑ کا پسر
دیکھتا ہے تو یہ تلواریں ہیں پڑتی کس پر

تیر کس کو لگے، غربال ہوا کس کا جگر؟
ذبح کرنے کو کسے کھینچے ہے ظالم خنجر

دلِ زہرا، جگرِ شیرِ خدا کٹتا ہے
ظلم سے تیرے محمدؐ کا گلا کٹتا ہے

Maara jaata hai tere saamne Zahra ka pisar
Dekhta hai tu yeh talwarein hain parti kis par

Teer kis ko lage, ghirbaal hua kis ka jigar
Zabah karne ko kise kheenche hai zalim khanjar

Dil-e-Zahra, jigar-e-Sher-e-Khuda katta hai
Zulm se tere Muhammad ka gala katta hai

قتلِ مظلوم کو کیوں کرتا ہے بے جرم و گناہ؟
اب تلک میں نے بہت صبر کیا ہے واللہ

دل جلی ہوں، میں ابھی سینے سے کھینچوں گر آہ
تو بھی جل جائے، تری فوج بھی ہو خاکِ سیاہ

بددعا دوں میں تو نازل ابھی آفت ہووے
سر کے بالوں کو جو کھولوں تو قیامت ہووے

Qatl-e-Mazloom ko kyun karta hai be-jurm-o-gunah?
Ab talak main ne bohat sabr kiya hai wallah

Dil jali hoon, main abhi seene se kheenchoon gar aah
Tu bhi jal jaaye, teri fauj bhi ho khaak-e-siyaah

Bad-dua doon main to nazil abhi aafat howe
Sar ke baalon ko jo kholoon to qayamat howe

غش میں حضرت نے سنے جبکہ یہ زینبؑ کے سخن
کھول کر دیدۂ پرخوں کو اٹھائی گردن

دیکھا سر ننگے کھڑی روتی ہیں مقتل میں بہن
بنتِ زہراؑ کو پکارے یہ شہنشاہِ زمن

کیا کیا تم نے کہ پردے سے کھلے سر نکلیں
جیتے جی میرے سر پردے سے باہر نکلیں

Ghash mein Hazrat ne sune jab ke yeh Zainab ke sukhan
Khol kar deedah-e-pur-khoon ko uthai gardan

Dekha sar nange khari roti hain maqtal mein behan
Bint-e-Zahra ko pukare yeh Shahanshah-e-Zaman

Kya kiya tum ne ke parde se khule sar niklein
Jeete ji mere sar parde se bahar niklein

کس کو سمجھاتی ہو، کوئی نہ سنے گا فریاد
باز آئے گا نہیں قتل سے میرے جلاد

جتنا تم پیٹتی ہو، اور لعیں ہوتے ہیں شاد
حشر کے روز خدا دیوے گا اس خون کی داد

شوق مرنے کا ہے، سر تن سے جدا ہونے دو
جاؤ گھر میں، مجھے امت پہ فدا ہونے دو

Kis ko samjhati ho, koi na sune ga faryaad
Baaz aaye ga nahin qatl se mere jallaad

Jitna tum peetti ho, aur laeen hote hain shaad
Hashr ke roz Khuda dewe ga is khoon ki daad

Shauq marne ka hai, sar tan se juda hone do
Jao ghar mein, mujhe ummat pe fida hone do

گود میں میری سکینہؑ کو اٹھاؤ ہمشیر
کوئی اصغرؑ کی طرح مار نہ بیٹھے اسے تیر

پھر یہ بیٹی کو پکارے: ترے صدقے شبیرؑ
تو بھی جا ساتھ پھوپھی جان کے اب اے دلگیر

وقتِ طاعت ہے، ذرا یادِ خدا کر لیویں
ہم بھی اب آتے ہیں، سجدے کو ادا کر لیویں

God mein meri Sakina ko uthao hamsheer
Koi Asghar ki tarah maar na baithe use teer

Phir yeh beti ko pukare: tere sadqe Shabbir
Tu bhi ja saath Phupphi jaan ke ab ae dilgeer

Waqt-e-ta'at hai, zara yaad-e-Khuda kar leween
Hum bhi ab aate hain, sajde ko ada kar leween

کہہ کے یہ غش ہوئے پھر رن میں شہنشاہِ امم
شمرِ اظلم نے رکھا سینۂ اقدس پہ قدم

جگرِ فاطمہؑ زہرا پہ چلی تیغِ دو دم
آگے زینبؑ کے ہوئے ذبح حسینؑ، آہ ستم

پیٹ کر بنتِ شہنشاہِ زمن رونے لگی
باپ کو بیٹی، برادر کو بہن رونے لگی

Keh ke yeh ghash hue phir ran mein Shahanshah-e-Umam
Shimr-e-Azlam ne rakha seena-e-aqdas pe qadam

Jigar-e-Fatima Zahra pe chali tegh-e-do-dam
Aage Zainab ke hue zabah Husain, aah sitam

Peet kar Bint-e-Shahanshah-e-Zaman rone lagi
Baap ko beti, baradar ko behan rone lagi

فتح کا فوجِ مخالف میں بجا نقارہ
غل ہوا قتل ہوا شیرِ خدا کا پیارا

بس انیسؔ! اب نہیں گویائی کا مجھ کو یارا
غم سے خوں ہو گیا سینے میں کلیجا سارا

کس سے اس درد و مصیبت کا بیاں ہوتا ہے
آنکھیں روتی ہیں، قلم روتا ہے، دل روتا ہے

Fatah ka fauj-e-mukhalif mein baja naqqara
Ghul hua qatl hua Sher-e-Khuda ka pyara

Bas Anees! ab nahin goyai ka mujh ko yaara
Gham se khoon ho gaya seene mein kaleja saara

Kis se is dard-o-musibat ka bayan hota hai
Aankhen roti hain, qalam rota hai, dil rota hai.