Agarche main ik chattan sa aadmi raha hoon

اگرچہ میں اک چٹان سا آدمی رہا ہوں
مگر ترے بعد حوصلہ ہے کہ جی رہا ہوں

Agarche main ik chattan sa aadmi raha hoon
Magar tere baad hausla hai ke ji raha hoon.

وہ ریزہ ریزہ مرے بدن میں اتر رہا ہے
میں قطرہ قطرہ اسی کی آنکھوں کو پی رہا ہوں

Woh reza reza mere badan mein utar raha hai
Main qatra qatra usi ki aankhon ko pi raha hoon.

تری ہتھیلی پہ کس نے لکھا ہے قتل میرا
مجھے تو لگتا ہے میں ترا دوست بھی رہا ہوں

Teri hatheli pe kis ne likha hai qatl mera
Mujhe to lagta hai main tera dost bhi raha hoon.

کھلی ہیں آنکھیں مگر بدن ہے تمام پتھر
کوئی بتائے میں مر چکا ہوں کہ جی رہا ہوں

Khuli hain aankhen magar badan hai tamaam patthar
Koi bataye main mar chuka hoon ke ji raha hoon.

کہاں ملے گی مثال میری ستم گری کی
کہ میں گلابوں کے زخم کانٹوں سے سی رہا ہوں

Kahan milegi misaal meri sitamgari ki
Ke main gulabon ke zakhm kaanton se si raha hoon.

نہ پوچھ مجھ سے کہ شہر والوں کا حال کیا تھا
کہ میں تو خود اپنے گھر میں بھی دو گھڑی رہا ہوں

Na poochh mujh se ke shehar walon ka haal kya tha
Ke main to khud apne ghar mein bhi do ghari raha hoon.

ملا تو بیتے دنوں کا سچ اس کی آنکھ میں تھا
وہ آشنا جس سے مدتوں اجنبی رہا ہوں

Mila to beete dinon ka sach us ki aankh mein tha
Woh aashna jis se muddaton ajnabi raha hoon.

بھلا دے مجھ کو کہ بے وفائی بجا ہے لیکن
گنوا نہ مجھ کو کہ میں تری زندگی رہا ہوں

Bhula de mujh ko ke bewafai baja hai lekin
Ganwa na mujh ko ke main teri zindagi raha hoon.

وہ اجنبی بن کے اب ملے بھی تو کیا ہے محسنؔ
یہ ناز کم ہے کہ میں بھی اس کا کبھی رہا ہوں

Woh ajnabi ban ke ab mile bhi to kya hai Mohsin
Ye naaz kam hai ke main bhi us ka kabhi raha hoon.