Bhadkaayen meri pyaas ko aksar teri aankhen

بھڑکائیں مری پیاس کو اکثر تری آنکھیں
صحرا مرا چہرہ ہے، سمندر تری آنکھیں

Bhadkaayen meri pyaas ko aksar teri aankhen
Sehra mera chehra hai, samundar teri aankhen.

پھر کون بھلا دادِ تبسم انہیں دے گا
روئیں گی بہت مجھ سے بچھڑ کر تری آنکھیں

Phir kaun bhala daad-e-tabassum unhein dega
Royengi bahut mujh se bichhar kar teri aankhen.

خالی جو ہوئی شامِ غریباں کی ہتھیلی
کیا کیا نہ لٹاتی رہیں گوہر تری آنکھیں

Khaali jo hui shaam-e-ghareebaan ki hatheli
Kya kya na lutaati rahin gauhar teri aankhen.

بوجھل نظر آتی ہیں بظاہر مجھے لیکن
کھلتی ہیں بہت دل میں اتر کر تری آنکھیں

Bojhal nazar aati hain ba-zahir mujhe lekin
Khulti hain bahut dil mein utar kar teri aankhen.

اب تک مری یادوں سے مٹائے نہیں مٹتا
بھیگی ہوئی اک شام کا منظر تری آنکھیں

Ab tak meri yaadon se mitaaye nahin mitta
Bheegi hui ik shaam ka manzar teri aankhen.

ممکن ہو تو اک تازہ غزل اور بھی کہہ لوں
پھر اوڑھ نہ لیں خواب کی چادر تری آنکھیں

Mumkin ho to ik taaza ghazal aur bhi keh loon
Phir odh na lein khwaab ki chaadar teri aankhen.

میں سنگ صفت ایک ہی رستے میں کھڑا ہوں
شاید مجھے دیکھیں گی پلٹ کر تری آنکھیں

Main sang-sifat ek hi raste mein khada hoon
Shayad mujhe dekhengi palat kar teri aankhen.

یوں دیکھتے رہنا اسے اچھا نہیں محسنؔ
وہ کانچ کا پیکر ہے تو پتھر تری آنکھیں

Yun dekhte rehna use achha nahin Mohsin
Woh kaanch ka paikar hai to patthar teri aankhen.